प्रचण्ड-माधव पक्षको स्थायी कमिटी बैठक बस्दै, ओलीलाई निष्कासनको एजेण्डा

काठमाडौं । विभाजित नेकपाको प्रचण्ड-माधव पक्षको स्थायी कमिटी बैठक आइतबार बस्दैछ । शनिबार केन्द्रीय कार्यालय पेरिसडाँडामा उपलब्ध स्थायी कमिटी सदस्यहरुबीचको छलफलपछि आइतबार बैठक बोलाइएको प्रवक्ता नारायणकाजी श्रेष्ठले जानकारी दिए ।

श्रेष्‍ठका अनुसार शनिबारको छलफलमा काठमाडौंमा शुक्रबारको विरोध सभाको समीक्षा र आन्दोलनका आगामी कार्यक्रमबारे छलफल गरिएको छ । आइतबार बस्ने बैठकले थप एजेण्डासहित नयाँ कार्यक्रम तय गर्ने बताइएको छ ।

आइतबारको स्थायी कमिटी बैठकले ओली पक्षका प्रदेश पदाधिकारी हटाएर आफ्नो पक्षकालाई समायोजन गर्ने तयारी छ । सोही बैठकले प्रधानमन्त्री केपी ओलीलाई नेकपाको साधारण सदस्यसमेत नरहने गरी निष्कासन गर्ने सम्भावना रहेको स्रोतले बताएको छ ।

यसअघि प्रचण्ड-माधव पक्षले केही दिन अगाडि तीन दिनको समय दिएर सोधेको स्पष्टीकरणपत्र बालुवाटार गेटमा बुझाएको थियो ।