दुई नेपाली फेसन डिजाइनरको पहिरनमा कमला ह्यारिस, प्रबल गुरुङ भन्छन् सपना- पुरा भयो – Nepal Press

दुई नेपाली फेसन डिजाइनरको पहिरनमा कमला ह्यारिस, प्रबल गुरुङ भन्छन् सपना- पुरा भयो

काठमाडौं । कमला ह्यारिस उपराष्ट्रपतिमा निर्वाचित भए लगत्तै विश्व फिल्म र फेसन उद्योगले स्वागत गरेको छ । फेसनको बाइबल भनिने प्रतिष्ठित भग म्यागजिनले कभर स्टोरी नै छाप्यो ।

सपथ ग्रहण समारोह होस् या ह्वाइट हाउस प्रवेशमा, ह्यारिसको पहिरन फेसन स्टेटमेन्ट नै बन्यो । उनले लगाएको कोटको अहिले विश्वव्यापी चर्चा भैरहेको छ । त्यो चर्चा नेपाली फेसन डिजाइनरमाझ व्यापक छ ।

भर्चुअल सपथ ग्रहण समारोहमा ह्यारिसले प्रबलले डिजाइन गरेको उल क्रिप ह्यान्ड टेलर्ड कोट लगाइन् ।

ह्यारिसले न्यूयोर्कस्थित नेपाली फेसन डिजाइनर प्रबल गुरुङ र पहिरन उत्पादक कम्पनी तारा ओरेन्टियलको डिजाइन लगाएर सपथ ग्रहण पछाडिका केही समारोहमा भाग लिइन् । यी दुबै नेपाली फेसन डिजाइनरले ह्यारिस आफूहरुको डिजाइनमा सजिँदा सपना पुरा भएको उल्लेख गरेका छन् ।

भर्चुअल सपथ ग्रहण समारोहमा ह्यारिसले प्रबलले डिजाइन गरेको उल क्रिप ह्यान्ड टेलर्ड कोट लगाइन् । ‘यो मेरा लागि सम्मानको कुरा हो’ प्रबलले इन्स्टाग्राममा लेखेका छन्, ‘यो मेरा लागि अमेरिकी सपनाको एउटा अध्याय हो ।’

एउटा आप्रवासी महिला उपराष्ट्रपति पदमा पुग्नुसँग आफ्नो संघर्ष र सपना पनि जोडिएको गुरुङले उल्लेख गरेका छन् । प्रबलको यो भनाइलाई ह्यारिसकी छोरी मीना ह्यारिसले पनि समर्थन व्यक्त गर्दै लभ रियाक्ट गरेकी छिन् ।

यसैगरि, लिंकन मेमोरियलमा आयोजना गरिएको ‘सेलेव्रिटिङ अमेरिका’ नामक इन्योगुरेसन कन्सर्टमा ह्यारिसले काठमाडौंमा निर्माण भएको कस्मिरी स्कार्फ पनि लगाएकी थिइन् । यो स्कार्फलाई नेपाली फेसन डिजाइनिङ कम्पनी तारा ओरेन्टियलले डिजाइन गरेको हो ।

इन्योगुरेसन कन्सर्टमा ह्यारिसले काठमाडौंमा निर्माण भएको कस्मिरी स्कार्फ पनि लगाएकी थिइन् ।

तारा ओरेन्टियलले आफ्नो इन्स्टाग्राम पृष्ठमा आफ्ना लागि यो क्षण गर्विलो भएको उल्लेख गरेको छ । यसअघि प्रबल गुरुङको डिजाइनमा फस्टलेडी मिसेल ओबामा लगायत सजिइसकेका छन् ।

प्रतिक्रिया

Leave a Reply

Your email address will not be published.