महिला लिगको स्तरोन्नति भएको पाएँ- सावित्रा भण्डारी – Nepal Press

महिला लिगको स्तरोन्नति भएको पाएँ- सावित्रा भण्डारी

काठमाडौं । नेपाली राष्ट्रिय महिला टोलीकी सर्वाधिक गोलकर्ता सावित्रा भण्डारीले घरेलु फुटबलमा पनि राज गरिरहेकी छन् ।

बुधबारदेखि काठमाडौंमा सुरु भएको राष्ट्रिय महिला लिग अन्तर्गत बिहीबार भएको खेलमा ह्याट्रिक गरेकी सावित्राले पुनः गोल स्कोरिङ फर्ममा फर्किएर जित हासिल गर्दा खुशी लागेको बताएकी छन् ।

एन्फा कम्प्लेक्स सातदोबाटोमा बिहीबार भएको खेलमा चन्द्रपुर नगरपालिकाविरुद्ध सावित्राले १४औं, ६२औं र ७२औं मिनेटमा गोल गरेकी थिइन् । ‘चन्द्रपुर जस्तो राम्रो टोलीविरुद्ध गोल गरेर जित निकाल्न पाउँदा खुशी लागेको छ,’ २३ वर्षीया स्टार सावित्राले भनिनन्, ‘प्रतिस्पर्धात्मक खेलमा फर्किन पाउँदा खुशी लागेको छ ।’

विगतको तुलनामा प्रतियोगिताको स्तरसमेत उन्नति भएको उनले बताइन् ।

सावित्राको ह्याट्रिकप्रेरित एपिएफले चन्द्रपुरलाई ६-० ले पराजित गरेको थियो । उक्त खेलमा ‘प्लेयर अफ दी म्याच’ घोषित भएकी सावित्रा प्लेयर अफ दी टुर्नामेन्टकी पनि दाबेदार हुन् ।

बिहीबारको जितामा एपिएफका लागि सावित्रासँगै अनिता बस्नेत, अन्जली योन्जन र प्रिती राईले १-१ गोल गरेका थिए । साविक विजेता समेत रहेको एपिएफले आफ्नो दोस्रो खेलमा शनिबार विराटननगर महानगरपालिकाको सामना गर्दैछ । विराटनगर आज भएको खेलमा वालिङ नगरपालिकासँग १-१ गोलको बराबरीमा रोकिएको थियो ।

प्रतिक्रिया

Leave a Reply

Your email address will not be published.