क्रिकेटलाई माया गर्ने देशको प्रशिक्षक बन्न पाउँदा खुशी छुः वाटमोर

काठमाडौं । नेपाली राष्ट्रिय क्रिकेट टोलीका नवनियुक्त मुख्य प्रशिक्षक डेभ वाटमोरले नेपालको क्रिकेट स्तर सुधार्ने प्रतिबद्धता गरेका छन् । नेपाल आएपछि बिहिबार पहिलोपटक पत्रकार सम्मेलनमा प्रस्तुत भएका उनले नेपाली टोलीसँग काम गर्न आफू उत्साहित रहेको बताए ।

‘नेपाल जस्तो क्रिकेटलाई माया गर्ने देशको प्रशिक्षक हुन पाउँदा मलाई एकदमै खुशी लागेको छ,’ श्रीलंकाली मूलका अस्ट्रेलियन प्रशिक्षक वाटमोरले भने, ‘मेरा लागि यो नयाँ चुनौती हो ।’

नेपालले पाएको एकदिवसीय अन्तर्राष्ट्रियको मान्यतालाई कायम राख्दै नेपाली क्रिकेटलाई थप माथि उठाउन कोशिश गर्ने प्रतिवद्धता उनले जनाए ।

वाटमोर गत डिसेम्बर १७ मा नेपाली टिमको प्रमुख प्रशिक्षक नियुक्त भएका हुन् । अस्ट्रेलियाका लागि ७ वटा टेस्ट र एक एकदिवसीय अन्तर्राष्ट्रिय क्रिकेट खेलेका उनी सन् १९९६ मा श्रीलंकाले विश्वकप जित्दा सो टोलीका मुख्य प्रशिक्षक थिए ।