टेकु अस्पतालमा एक वर्षपछि कोभिडबाहेकका बिरामीको उपचार शुरू

काठमाडौं । देशको एक मात्र सरुवा रोग अस्पताल शुक्रराज ट्रपिकल अस्पतालमा झण्डै एक वर्षपछि कोभिडबाहेकका बिरामी पनि भर्ना लिन थालिएको छ ।

कोरोना भाइरस संक्रमण दर घटेसँगै पूर्ववत्‌रुपमा ननकोभिड सेवा शुरू गरिएको अस्पतालका निर्देशक सागरकुमार राजभण्डारीले जानकारी दिए । स्वास्थ्य मन्त्रालयको निर्देशनअनुसार आइतबारबाट सेवा थालिए पनि भर्ना हुने बिरामी न्यून छन् । नेपालमा माघ १० मा कोरोनाको पहिलो केस भेटिएको थियो । जोखिमलाई ध्यान दिँदै अस्पतालले कोरोनाबाहेकका बिरामीको उपचार बन्द गरेको थियो ।

अधिकांस संक्रमित होम आइसोलेसनमा बस्‍ने र गम्भीर प्रकृतिका मात्र अस्पताल आउने भएकोले कोभिडका बिरामी न्यून संख्यामा भर्ना हुन थालेको अस्पतालले जनाएको छ । उपचारार्थ वार्डमा भर्ना भएका संक्रमितलाई भने अर्को कोठामा स्थानान्तरण गरिएको छ ।

टेकु अस्पतालमा एचआईभी, क्षयरोगलगायतका सरुवा रोगका बिरामीहरू भर्ना गरेर उपचार गरिँदै आइएको छ ।