निर्वाचन आयोगले काम थाल्यो, चुनावी प्रक्रियाबारे दलसित छलफल – Nepal Press

निर्वाचन आयोगले काम थाल्यो, चुनावी प्रक्रियाबारे दलसित छलफल

छलफलमा प्रचण्ड–माधव पक्ष पनि सहभागी, माघ १५ देखि मतदाता नामावली अद्यावधिक गरिने

काठमाडौं । निर्वाचन आयोगले मतदाता नामावली, मतदानस्थल र मतदान केन्द्र पुनरावलोकनका विषयमा ३ वटै तहमा प्रतिनिधित्व गर्ने ११ राजनीतिक दलसंग छलफल गरेको छ । निर्वाचन आयोगले बोलाएको छलफल कार्यक्रममा प्रचण्ड–माधव नेपाल पक्षीय नेकपाका प्रतिनिधि पनि सहभागी भए ।

छलफलमा नेपाल कम्युनिष्ट पार्टी ओली पक्षबाट बाबुराम दाहाल, नेकपा प्रचण्ड–नेपाल पक्षबाट राजेन्द्र पाण्डे र लिलामणि पोखरेल तथा नेपाली कांग्रेसबाट आनन्तराज ढुंगाना सहभागि थिए ।

२०७८ साल वैशाख १७ र २७ गते निर्वाचन गर्नका लागि तयारी गरिरहेको आयोगले छलफलका १४ राजनीतिक दलका प्रतिनिधिलाई बोलाए पनि ११ दलको मात्र उपस्थिति थियो ।

आयोगले ३ वटै तहमा प्रतिनिधित्व गर्ने राजनीतिक दलबाट मतदाता नामावली, मतदान स्थल र मतदान केन्द्र पुनरावलोकनका विषयमा सुझाव तथा प्रतिक्रिया लिएको आयोगका सह–सचिव एवम प्रवक्ता राजकुमार श्रेष्ठले जानकारी दिए ।

श्रेष्ठका अनुसार आयोगले निर्वाचन प्रक्रियामा सहभागी भइदिन आग्रह गर्नुका साथै आफ्ना मातहतका समितिमार्फत् सबै नागरिकलाई जानकारी गराउनका लागि पनि आग्रह गरेको छ । आयोगले निर्वाचनको तयारी कार्यक्रम सफल पार्नका लागि १४ वटै राजनीतिक दललाई समन्वय र सहजीकरण गर्नका लागि पनि आग्रह गरेको श्रेष्ठले बताए ।

मतदाता नामावली अध्यावधिक गर्नका लागि आयोगले माघ १५ गते देखि २१ गतेसम्मको समय तोको छ । यस अवधिमा मतदाता नामावलीको सूचना प्रकाशन गर्ने, त्रुटि सच्याउने, दोहोरो नाम परेको भए हटाउनेलगायतका छन् ।

प्रतिक्रिया

Leave a Reply

Your email address will not be published. Required fields are marked *