नेपाल-भारत संयुक्त आयोग बैठकअघि दुई देशका परराष्ट्रमन्त्रीबीच भेट

काठमाडौं। नेपाल-भारत संयुक्त आयोगको बैठक बस्‍नुअघि दुई देशका परराष्ट्रमन्त्रीहरूबीच भेटघाट भएको छ।

बैठकअघि नेपालका परराष्ट्रमन्त्री प्रदीप ज्ञवाली र भारतीय विदेश मन्त्री एस जयशंकर अनौपचारिक छलफलमा जुटेका हुन्।

बैठक हैदरावाद हाउसमा केही बेरपछि शुरू हुँदैछ। संयुक्त आयोगको बैठकको अध्यक्षता दुवै परराष्ट्रमन्त्रीले संयुक्त रूपमा गर्दैछन्।

आयोगको बैठकमा भाग लिन परराष्ट्रमन्त्री ज्ञवाली नेतृत्वको १२ सदस्यीय टोली बिहीवार नै दिल्ली पुगिसकेको छ।

नेपाल र भारतबीच नक्सा विवाद भएपछि नेपालबाट भएको यो पहिलो उच्चस्तरीय भारत भ्रमण पनि हो। यसअघि भारतीय विदेश
सचिव,सेना प्रमुख र गुप्तचर प्रमुखले नेपाल भ्रमण गरेका थिए।

नेपालले कालापानी लगायत सीमा विवाद टुंग्याउने विषयलाई पनि बैठकमा उठाउने तयारी गरिरहेको छ। तर, भारतले भने सीमा विवादको विषय आयोगमा आउन नदिन चाहेको छ।