सूर्योदय एसईई बास्केटबल भोलिदेखि

काठमाडौं । विद्यालय स्तरीय प्रथम पीएचसीए ओपन सूर्योदय एसईई ३X३ बास्केटबल कप भोलिदेखि हुने भएको छ । सूर्योदय एजुकेशन फाउन्डेसनको आयोजनामा हुन लागेको यो प्रतियोगितामा पुरुषतर्फ ३२ तथा महिलातर्फ १६ टीमको सहभागी हुने निश्चित भएको आयोजकले जानकारी दिएको छ ।

डिल्लिबाजरस्थित फाउन्डेसनको प्राङ्गडमा हुने प्रतियोगितामा पुरुषतर्फको विजेताले २० हजार नगद पुरस्कार जित्ने छन् भने द्वितीय र तृतीयले क्रमशः १० हजार र ५ हजार नगद प्राप्त गर्नेछन् । महिलातर्फ भने विजेताले १५ हजार, उपविजेताले ८ हजार तथा तेस्रो हुनेले ४ हजार नगद प्राप्त गर्नेछन् ।

महिला तथा पुरुष दुवैतर्फका ‘मोस्ट भ्यालुएबल प्लेयर’ र ‘सर्वाधिक स्कोरर’ले २/२ हजार रूपैयाँ नगद हात पार्ने आयोजकले पत्रकार सम्मेलनमार्फत् जानकारी दिएको हो । कूल ३ लाख १२ हजार रूपैयाँ लागतमा हुन लागेको प्रतियोगिताका लागि पेसिफिक हस्पिटालिटी एन्ड कलिनरी एकेडेमीले टाइटल स्पोनसर गरेको छ ।