भारत, रुस र युएइबाट खोप ल्याउन पहल, पहिलो चरणमा ३० प्रतिशत जनसंख्यालाई

काठमाडौं । सरकारले खोप ल्याउन भारत, रुस र युइएसँग छलफल गरिरहेको जनाएको छ । स्वास्थ्य मन्त्रालयमा सोमबार आयोजित पत्रकार सम्मेलनमा स्वास्थ्यमन्त्री हृदयेश त्रिपाठीले खोप चाँडै नेपालमा आउने बताए । ती तीन देशका राजदूतसँग प्रक्रिया र ढुवानीका बारेमा छलफल भैरहेको उनले जानकारी दिए ।

कोभ्याक्समार्फत आउने खोप सुरुमा ३० प्रतिशत जनसंख्यालाई दिइने र बाँकी ३० प्रतिशत खरिद प्रक्रियामार्फत ल्याइने जानकारी दिँदै त्रिपाठीले निःशुल्क खोप प्रदान गरिने प्रतिबद्धता दोहोर्‍याए । ‘चाँडै खोप ल्याउन खोप बनिरहेको मुलुकका सरकार प्रमुखसँग छलफल गरिरहेका छौं । म स्वयमले भारत, रुस र युइएका राजदूतहरुसँग कुरा गरिरहेको छु’ त्रिपाठीले भने, ‘जति सम्भावना छन् आपूर्तिका, ती सबैलाई खुला राखेर ल्याउन लागिएको छ ।’

नेपाल कोरोना नियन्त्रणमा सार्क मुलुकमै अग्रस्थानमा, कोभिड अस्पताल खाली

खोप कहिले ल्याइन्छ भन्ने निश्चित मिति भने उनले तोकेनन् । ‘खोप चाँडै आउँछ र निःशुल्क लगाइन्छ’ उनले भने । खरिद प्रक्रियामा सरकार पारदर्शी ढंगले अघि बढेको र यस काममा नीजि क्षेत्रलाई पर नराखिने उनले बताए । कोभ्याक्सबाट आउने खोप सुरुमा जोखिम वर्ग, ५० वर्ष उमेर माथिका र दीर्घरोगीलाई लगाइने समेत उनले जनाए ।

खोप व्यवसायिकभन्दा पनि राजनीतिक सामाग्रीको रुपमा देखापरेको समेत टिप्पणी उनले गरे । ‘हामीले खोप आयात विशुद्ध व्यवसायिक हो भन्ने ठानेका थियौं तर, त्यस्तो होइन रहेछ’ उनले भने, ‘यो त राजनीतिक सामाग्री जस्तो पो देखियो ।’ खोप आपूर्ति र वितरणलाई अभियान र मिसनको रुपमा लिइएको मन्त्री त्रिपाठीले बताए ।

भारतमा कोरोना खोपको तयारी, शुरुमा ३० करोडलाई खोप दिइने

खोप लगाउनको लागि १६ हजार खोप केन्द्र परिचालित गरिने जनाउँदै त्रिपाठीले यस कार्यमा खट्नको लागि ५ हजार कर्मचारी र ५२ हजार स्वयंसेवक खटाइने समेत जनाए । खोप भण्डारण पर्याप्त रहेको उनले बताए । संक्रमणको दर घटेपनि जोखिम पनि यथावत रहेको बताउँदै मन्त्री त्रिपाठीले सतर्कता अपनाउन समेत आग्रह गरे ।