प्रधानमन्त्री ओली क्रान्तिकारी होइन, कायर हो : गगन थापा – Nepal Press

प्रधानमन्त्री ओली क्रान्तिकारी होइन, कायर हो : गगन थापा

काठमाडौं । नेपाली कांग्रेसका नेता गगन थापाले प्रधानमन्त्री केपी शर्मा ओली ‘क्रान्तिकारी’ नभई ‘कायर’ व्यक्ति भएको आरोप लगाएका छन् । काठमाडौं क्षेत्र नम्बर ४ प्रदेशसभा ‘ख’ मा आयोजित विरोध सभामा बोल्दै नेता थापाले संविधान र लोकतन्त्रको कदर नगर्ने व्यक्ति क्रान्तिकारी नभई कायर सावित हुने बताएका हुन् ।

प्रधानमन्त्री ओलीले प्रतिनिधिसभा विघटनको विरोध गर्नेहरुलाई संविधान पढ्न आग्रह गरेकोतर्फ इंगित गर्दै थापाले खुलामञ्चमा संविधान बोकेर बहस गर्न तयार रहेको बताए । थापाले भने– प्रधानमन्त्रीज्यू तपाई संविधानसभाको अध्यक्ष सुवास नेम्वाङ लिएर आउनुस् । हामी संविधान जारी गर्ने पूर्व राष्ट्रपति रामवरण यादव लिएर आउँछौं । संविधान कसले पढ्यो पढेन खुल्ला बहस गरौं ।

संसद र संविधान पुनःस्थापना नै कांग्रेसको एजेण्डा रहेको भन्दै थापाले संसद पुनःस्थापनापछि राजनीतिक कोर्स सच्याएर बल्ल चुनाव हुने बताए । उनले अदालतले संविधानको भावना अनुसार फैसला गर्ने आशा पनि व्यक्त गरे । ‘यो अदालतप्रति हामीलाई विश्वास छ । श्रीमानले हिजो जय नेपाल भन्नुभयो कि मुठ्ठी कस्नुभयो मतलब भएन । तर अहिले दायाँबायाँ नहेरी संविधान हेरेर निर्णय दिनुहोला’, थापाले भने ।

संसद पुनःस्थापनापछि कांग्रेसले प्रधानमन्त्री र राष्ट्रपतिलाई पदीय जिम्मेवारीबाट बिदा गर्ने थापाले बताए । जनमतको अपमान गर्ने काम प्रधानमन्त्रीबाटै भएकाले सरकारले सजिलै चुनाव गराउँछ भनेर उत्साहित हुनुको अर्थ नभएको थापाको भनाई छ ।

‘चुनाव हुन्छ तर यो सरकारले गराउँदैन । संसद पुनःस्थापनापछि यो सरकार हट्छ । राष्ट्रपतिलाई पनि शीतलनिवासबाट बिदा गर्छौ । अनि जुन –जुन चुनाव हुनुपर्ने हो त्यतिबेला हुन्छ’, थापाले भने । उनले प्रधानमन्त्रीले आफ्नै घर जलाएर खरानीको टीका लगाएर देश दौडाहामा हिडेको आरोप समेत लगाए ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर
नेपाल अपडेट ट्रेन्डिङ