राष्ट्रियसभामा नेकपा दलका नेता शर्माले भने– पार्टी फुट्दा मुटु चिरिए जस्तो भएको छ
काठमाडौं । सत्तारुढ नेपाल कम्युनिष्ट पार्टीका राष्ट्रियसभा दलका नेता दिनानाथ शर्माले पार्टी फुट्दा मुटु चिरिएको अनुभव गरेको बताएका छन् ।
राजनीतिक रुपमा नेकपा विभाजित भइसकेको भए पनि राष्ट्रियसभामा दुवै पक्षको प्रतिनिधिको रुपमा सम्बोधन गर्दै शर्माले यस्तो बताएका हुन्।
‘मैले मुटु चिरिएको, फुटेको अनुभव गरेको छु,’ शर्माले भने, ‘यसअघिका कुनै पनि फुटमा यस्तो अनुभव भएको थिएन ।’
उनले थपे, ‘मेरो राजनीतिक इतिहासको ५५/५६ वर्षको अनुभव र अहिलेसम्मको यात्रामा पार्टी एकता भएर नेकपा बन्दा म सबैभन्दा खुसी थिए । नेपाली जनता खुसी थिए । नेपाली जनता खुसी भएकाले नै त्यो खुसी निर्वाचनमा प्रकट भएको थियो ।’
पार्टी फुट्दा कोही पनि खुसी नभएको भन्दै उनले पार्टी जोड्ने रसायन बाँकी भए अझैं पनि लाग्नु परेको बताएका छन् । ‘कसैले पनि पार्टी विभाजन छैन्,’ उनले भने, ‘मैले सबैका मलिन अनुहार देखेको छु । अझै पनि हामी एक ठाउँमा हुने सम्भावना छन्, केही रसायन छन् भने हामी त्यस कुरामा प्रत्यन गरौं ।’
उनले पार्टी विभाजन कुनै पनि सिद्धान्त र दर्शनमा नभई व्यक्तिगत आकांक्षाका कारण भएको बताए।