इडिन्सन काभानीलाई तीन खेलको प्रतिबन्ध, एक लाख पाउन्ड जरिवाना

एजेन्सी । म्यानचेस्टर युनाइटेडका उरुग्वेली स्ट्राइकर इडिन्सन काभानी तीन खेलको प्रतिबन्धमा परेका छन् । सामाजिक सन्जालमा रंगभेदी शब्दको प्रयोग गरेको आरोपमा छानबिनपछि एक लाख पाउन्ड जरिवानासहितको कारबाही सुनाइएको हो ।

३३ वर्षीय यी स्ट्राइकरले इंग्लिस फुटबल एशोसिएसनसँग आफ्नो गल्ती स्वीकार गरिसकेका छन् । काभानीले २९ नोभेम्बरमा साउथह्याम्प्टनमाथिको जितका लागि गोल गरेपछि इन्स्टाग्रामममा केही टिप्पणी गरेका थिए, जुन स्पेनिस भाषामा थियो ।

उनको पोष्टको अनेक अर्थ लाग्न थालेपछि तत्कालै डिलेट गरी माफी पनि मागेका थिए । जरिवाना र प्रतिबन्धसँगै उनले ‘फेस–टू–फेस’ शैक्षिक कार्यक्रममा पनि सहभागी हुनुपर्नेछ ।

काभानीको प्रतिबन्ध तत्कालै लागू हुनेछ र प्रिमियर लिगमा नयाँ वर्षको दिनमा एस्टोन भिल्लासँग हुने खेल उनले गुमाउनेछन् । उनले ६ जनवरीमा हुने लिग कप सेमिफाइनलमा म्यानचेस्टर सिटी र ९ जनवरीमा एफए कपको तेस्रो चरणमा वाटफोर्डसँगको खेल गुमाउनेछन् ।