फिल्म ‘गणपति’ निर्माण घोषणा, मुकुन–मेनुकाले जोडी बाँध्ने – Nepal Press

फिल्म ‘गणपति’ निर्माण घोषणा, मुकुन–मेनुकाले जोडी बाँध्ने

कोरोनाभाइरस महामारीकै बीच सोसल ड्रामा फिल्म ‘गणपति’ निर्माण घोषणा भएको छ । सरकारले फिल्म छायांकन फुकुवा गरे लगत्तै पहिलोपटक फिचर फिल्म निर्माण हुन लागेको हो ।

मंगलबार राजधानीमा आयोजित प्रेसमिटमा निर्माताले फिल्म बनाउने जानकारी दिए । मुकुन भुषाल र मेनुका प्रधानको मुख्य भूमिका रहने फिल्मलाई डेब्यु निर्देशक सविन अधिकारीले निर्देशन गर्ने छन् ।

‘भगवान र मान्छेबीचको फरक’ भन्ने बटमलाइनमा बन्ने फिल्ममा भुषालले मुख्य पात्रको भूमिका गर्नेछन् । ‘यो भूमिका मेरा लागि चुनौतिपूर्ण छ र यसका लागि मानसिकरुपमा पनि रेडी छु’ नेपाल प्रेससँगको प्रश्नमा उनले भने, ‘मेरो चरित्र एउटा वास्तविक घटनामा आधारित हुनेछ ।’

नौ महिनापछि सरकारले फिल्म छायांकन खुला गरे लगत्तै परिस्थितीलाई सामान्य बनाउन आफूले फिल्म निर्माणमा अग्रसरता लिएको निर्माता लक्ष्मण थापाले बताए । ‘हल तत्कालै खुल्ला वा नखुल्ला तर, हामी फिल्मलाई राम्रोसँग बनाउने तयारीमा छौं’ उनले भने ।

निर्देशक अधिकारीले लकडाउन कालखण्डमा दर्शकको फिल्म ज्ञानमा वृद्धि भएकाले सोही अपेक्षाअनुसारको फिल्म बनाउनुपर्ने चुनौति थपिएको बताए । ‘यो विशुद्ध नयाँ र वास्तविक कथा हो । राम्रो फिल्म बन्नेछ’ निर्देशक अधिकारीले भने, ‘दर्शकले हाम्रो कामलाई रुचाइदिनुहुन्छ भन्ने विश्वास छ ।’

माघदेखि छायांकन सुरु हुने फिल्मको प्रदर्शन मिति तय छैन । फिल्ममा सूर्यमाला शर्मा, जयनन्द लामा, प्रकाश घिमिरे, राजाराम पौडेल, पुष्कर गुरुङ, अंशु मानन्धर, कालु राना, अर्जुन गुरुङ, श्रीदेव बिएल र सुशिल पोखरेलको मुख्य भूमिका हुनेछ ।

फिल्मको पटकथा स्वयम निर्देशक अधिकारीको हुनेछ । हरिबहादुर घलेको छायांकन, गोविन्द शाहीको वितरण, अनिश अधिकारीको संगीत हुनेछ । तनहुँको बन्दीपुर गाउँपालिका थारुबासमा फिल्म छायांकन हुने जानकारी गराइएको छ ।

सरकारले छायांकन अनुमति दिएलगत्तै आगामी माघ र फागुनदेखि अन्य फिल्म पनि सुटिङमा जाने तयारीमा छन् ।


प्रतिक्रिया

Leave a Reply

Your email address will not be published. Required fields are marked *