बिपन्न गायकलाई सघाउन राजेशपायलले घरमै खोले आधुनिक स्टुडियो

राइ इज किङ अर्थात राजेशपायल राई मनदेखि उदार छन् । नेपाली चार्टबस्टरका यी हिट गायकले संगीतभित्रै समाजसेवाको पहल थालेका छन् । ‘दर्शन नमस्ते’ गायकको सन् २०२० यिनै पहलमा बित्यो । राजेशपायललाई चासो राख्नेमाथि नयाँ खबर छ ।

गरिब, बिपन्न एवं प्रतिभावान गायक–गायिकालाई उनले निःशुल्क गीत रेकर्डिङ गरिदिने भएका छन् । यसका लागि उनले घरमैभव्य स्टुडियो स्थापना गरेका छन् । पैसा नहुने बिपन्न गायक–गायिकालाई निःशुल्क सेवा दिने उद्देश्यले राइ इज किङ स्टुडियो स्थापना भएको छ ।

हिजोआज सांगीतिक स्टुडियो व्यवसायिक हुँदा नयाँ र प्रतिभावान गायकलाई गीत रेकर्ड गर्न मुस्किल भएपछि आफैले स्टुडियो खोल्नुपरेको राईको कथन छ । दुई वर्षअघि किनेको काठमाडौंस्थित घरमै स्टुडियो खोलेका छन् । घरभित्रै जिमखाना पनि खुलेको छ । उनी दैनिक घरभित्रै व्यायाम गर्छन् ।

स्टुडियोलाई अझै आधुनिक बनाउने योजना छ उनको । अहिलेसम्म अविवाहित गायकले चाँडै विहे गर्ने र त्यो विहे अन्तरजातिय पनि हुनसक्ने बताए । केही महिनामै नयाँ एल्बम रिलिज गर्ने र त्यसको रेकर्डिङ आफ्नै स्टुडियोमा हुने राईले बताए ।