साउदीसहित १३ मुलुकद्वारा बेलायतसँगको उडानमा रोक

कोरोनाभाइरसको दोस्रो लहर शुरु भएसँगै साउदी अरबले एक साताका लागि अन्तर्राष्ट्रिय उडानमा रोक लगाएको छ । सीमासहित सिल गरिएको जनाइएको छ ।

युरोपबाट साउदी फर्किएकाहरुलाई उसले एकसाता आइसोलेसनमा रहन भनेको छ । युरोपसहित कोरोना प्रभावित क्षेत्रबाट आएकालाई अनिवार्य कोभिड परीक्षणका लागि भनिएको छ ।

टर्कीले पनि बेलायत, डेनमार्क, दक्षिण अफ्रिका र नेदरल्यान्डबाट हुने हवाई यातायातलाई अस्थायी रोक लगाएको छ । अहिलेसम्म विश्वमा ७ करोड ७१ लाख ६९ हजार ३५९ जनामा भाइरस संक्रमण पुष्टि भएको जोन हप्किन्स युनिभर्सिटीले जनाएको छ । १६ लाख ५९ हजार ५६० जनाको मृत्यु भएको छ ।

भाइरसले रुप बदलेका प्रमाणहरु भेटिन थालेपछि वैज्ञानिकका लागि टाउको दुखाइको विषय बनेको छ । बेलायतमा म्युटेसनका केसहरु भेटिन थाल्दा खोपको प्रभावकारितामा चुनौती सिर्जिएको बताइन्छ। म्युटेसनको भाइरस अघिल्लोभन्दा ७० प्रतिशतले जोखिमपूर्ण हुने जनाइएको छ ।

यसैबीच, बेलायतले अंग्रेजी नयाँवर्ष शुरु हुन थालेसँगै कडा प्रतिबन्ध लागू गरेको छ । लन्डनमा घरबाट बाहिर निस्कन रोक लगाइएको छ । फ्रान्स, जर्मनी, इटाली, स्वीट्जरल्यान्ड, पोर्चुगल, बेल्जियम, अष्ट्रिया, बुल्गेरिया, डेनमार्क, फिनल्यान्ड, रोमानिया, क्रोसिया र नेदरल्यान्डले बेलायतसँगको हवाई उडानमा रोक लगाएका छन् ।