चार्ली हेप्डो हमला प्रकरणः फ्रान्सेली अदालतद्वारा १४ जना दोषी ठहर

एजेन्सी । फ्रान्सको एउटा अदालतले सन् २०१५ मा पेरिसस्थित एक ब्यंग्य पत्रिका चार्ली हेप्डोको कार्यालयमा भएको चरमपन्थी हमलामा आतंकबादीलाई सहयोग गरेको आरोपमा १४ जनालाई दोषी प्रमाणित गरेको छ ।

२०१५ को जनवरीमा भएको सो आतंकबादी हमलामा १७ जनाको मृत्यु भएको थियो । ७ जनवरीमा चार्ली हेप्डोको कार्यालयमा भएको आक्रमणमा १२ जना मारिएका थिए । त्यसको १ दिनपछि एकजना महिला प्रहरी अधिकारीको गोली हानी हत्या भएको थियो भने ३ दिनपछि सुपरमार्केटमा भएको गोली हानाहानमा ४ जना मारिएका थिए ।

बुधबार गरिएको सुनुवाईमा ११ जना अभियुक्त अदालतमै उपस्थित थिए । तीनजनाको अनुपस्थितिमै बहस गरिएको थियो ।

एक अभियुक्त हयात बाओमुद्धिन अदालतमा उपस्थित थिइनन् । उनी सुपरमार्केटमा हमला गर्ने अमोदी कोउलीवालीकी साथी थिइन् र हमलाको एक साता अगाडि नै सिरिया भागेकी थिइन् ।

अदालतले उनलाई आतंकबादी नेटवर्कको सदस्य पाएको भन्दै ३० वर्षको कैद सजायँ सुनाएको छ । यो हमलाका मुख्य अभियुक्त मानिएका अली रजा पोलाटलाई पनि अपराधमा सहभागी भएकोमा दोषी प्रमाणित गरी ३० वर्षको अजाय सुनाइएको छ ।

१४ आरोपीलाई फरक फरक अभियोगमा दोषी करार गरिएको छ । अदालतमा उपस्थित ११ मध्ये ६ जना अभियुक्तलाई आतंकबाद बाहेकको अपराधमा दोषी ठहर गरिएको छ ।