कोरोना संक्रमणबाट विदेशमा ३ सय १ नेपालीको मृत्यु

कोरोना भाइरसबाट नेपाली डायस्पोरामा ज्यान गुमाउनको संख्या तीन सय नाघेको छ । गैरआवसिय नेपाली संघको तथ्यांकअनुसार २० मुलुकमा नेपालीले ज्यान गुमाएका हुन् । यो साता जर्मनी र भारतमा एकएक जनाको मृत्यु भएको एनआरएनएले जनाएको छ ।

कोभिडले जर्मनीमा मृत्यु हुने नेपालीको पहिलो घटना भएको एनआरएनए प्रेस संयोजक चिरन शर्माले जानकारी दिए । स्वास्थ्य समिति संयोजक सञ्जीव सापकोटाका अनुसार यो साता जापान, साउदी अरब, युएई, पोर्चुगल र भारतमा रहेका थप नेपालीमा भाइरस संक्रमण भएको छ ।

गैरआवसिय नेपाली संघ अन्तर्गतको स्वास्थ्य समिति संयोजक डा. सापकोटाले कोरोना भाइरसविरुद्धको खोप चाँडै प्रयोगमा आउने विश्वास व्यक्त गरे । अमेरिका, बेलायत लगायत मुलुकले फाइजर भ्याक्सिन प्रयोगमा ल्याउनुले आशा पलाएको उनको भनाई छ ।