प्रभास र दीपिका स्टारर एक्सन फिल्ममा अमिताभको पारिश्रमिक २१ करोड !

एजेन्सी : बलिउडका ‘योङ्ग्री योङ म्यान’ अमिताभ बच्चनको क्रेज उमेरको वृद्धिसँगै बढ्दैछ । बुढेसकालमा पनि उनको क्रेजको ग्राफ उकालो लाग्दैछ । उनले आगामी फिल्मका लागि पारिश्रमिक पनि बढाइरहेका छन् ।

प्रभास र दीपिका पादुकोणको आउँदो एक्सन थ्रीलर फिल्ममा बिग बच्चनले २१ करोड भारु पारिश्रमिक लिँदैछन् । फिल्मलाई नाग आश्विनले निर्देशन गर्दैछन् । सय करोड भारुभन्दा बढीको लगानीमा निर्माण हुने फिल्मले भविष्यको कथा भन्नेछ ।

‘आफ्नो केन्द्रिय भूमिका हुने उक्त एक्सन फिल्मका लागि अमिताभले २१ करोड भारुमा अनुबन्धन स्वीकार गर्नुभएको छ’ स्रोतको हवाला दिँदै बलिउडहंगामाले समाचार पुष्टि गरेको छ । सन् २०२३ मा रिलिज लक्ष्य राखिएको फिल्म छायांकन आउँदो वर्षदेखि सुरु हुनेछ ।

नाग आश्विनको उक्त फिल्मअघि बच्चन रणवीर कपुर र आलिया भाट स्टारर ‘ब्रम्हाष्त्र’ र अजय देवगणको ‘मे–डे’मा प्रस्तुत हुँदैछन् । बालाजी मोसन पिक्चर्सको नयाँ फिल्म ‘डेड्ली’मा समेत अमिताभ देखिँदैछन् ।